مطلقة وتعول، تعرفت على من يماثلها في العمر، متزوج من قريبة له، ولديه طفلان, عندما تعارفا وجدته شديد الحزن, شديد التعلق بولديه, شديد الخوف من فقدانهم، مفتقد الكثير مما تمنحه الحياة الزوجية.
واقلب بقى ع اللغة العامية..
اتكلموا، واتعرفوا، وشكا لها حاله من افتقاده لكتير من الحاجات اللى محتاجها فى الجواز, كالصداقة، والعلاقة الحميمية، واللى كان فيها نقص لأن زوجتة مريضة بداء الضغط، والوزن الزائد، ومش مثقفة، ولا فيه بينه وبينها اى تفاهم ولا اى حاجة مشتركة, هواية أو ثقافة.
يعنى من الاخر نقيضين عايشين مع بعض،
وقالها انه جرب يعمل كل حاجة علشان يخرج من احساسه بالنقص والفشل وعدم الراحة, عمل علاقات غير شريعة طبعاً, حفظ قران, قوى علاقته بربنا, وعمل عمرة, عرض على مراته ان يتجوز مرة تانية، وقالها انها ما فيهاش عيب بس هو اللى ربنا مخليه كده، وطبعاً رفضت باصرار، وهددته بالانفصال وحرمانه من اولاده.
واخر حاجة عملها انه راح حج بيت الله، وهناك دعا ربنا وسأله يوهبه زوجة كويسة ترضى بظروفه ولا تؤثر على بيته،
وقد كان.. وابتدا يتكلم فى الجواز مع صاحبتى دى واللى كانت محتاجه احتواء ومشاعر. طبعا واجهتها مشاكل كتيرة جدا، واهلها رفضوا فكرة انه متجوز وعايز زوجة تانية بدون علم مراته، وقالوا لها انه هيطلقك لو مراته عرفت لانه بصورة او بأخرى مهتز نفسياً، وشديد التعلق بأولاده، واصروا على ضرورة ابلاغ الزوجة الاولى وطبعا هى رفضت وكان مبررها انها ما تحبش تكون سبب فى اذى حد، وشافت انه من حق اى انسان انه يدور على راحته طالما مش هيضر حد ولا هيوجع حد.
كترت المشاكل وهى مصممة على رفض ابلاغ الزوجة الاولى ومقتنعة انها هتبقى سعيدة معاه، واتفقوا على الجواز بعد كثير من المشاكل اللى حصلت لأنه كان بصراحة بنى ادم طيب، وهى دى الميزة الوحيدة اللى فيه،
مالهوش اى دور فى اى حاجة.. ضعيف الشخصية لاقصى حد,
عايزة اقولكم ان صاحبتى هى اللى كانت بتعمل كل حاجة.
هو صحيح جاب لها شقة، وادالها فلوس قالها انا ماليش فى شراء حاجة واخاف انزل معاكى حد يشوفنى، فانتى مع نفسك افرشى الشقة!!
وقد كان.. نزلت اشترت العفش وفرشت الشقة ونضفتها..
حتى النجف اشترته وهى اللى طلعت تركبه، واكتفى جوزها بانه مسك لها السلم،
وطبعا كان فيه مشاكل في البيت عنده بسبب معاملة مراته ليه واللى كانت تتسم بقوة الشخصية من ناحيتها، وانعدامها من ناحيته.
وطبعا كانت صاحبتى صديقة مقربة ليه غير انها مراته يعنى، وكان بيحكيلها على كل حاجة، وبطبيعتها العقلانية ابتدت توجهه للتصرفات السليمة اللى المفروض الراجل.. الزوج.. الراعى.. يعامل ويتعامل بيها وابتدى فى تنفيذ خطتها والتى اتت بثمارها
وبدأت صاحبتى تظبط له البيت، وتحاول توجهه لطريقة التعامل الصحيح،
وكانت بتقوله ان الراجل راجل لازم يكون ليه احترامه في البيت خصوصا قدام الولاد والا هيكون ايه لازمة انك تتحمل النواقص اللى موجودة في مراتك؟، وليه مستحمل انك تكون متجوز في السر مع انه حقك شرعا؟
وفعلاً ابتدا يتعامل بطريقة جديدة مع مراته، اللي في النهاية اتظبطت، والبيت بقى ماشى زى ما كان بيحلم، وبرضه من هنا ابتدا التغيير يظهر على الراجل ده بس من ناحية صاحبتى.
وافتكر انها قالتلى انه قالها: انا غلط,, بقالى 11 سنة بعانى ومش عارف اصلح بيتى، وانتى في اسبوعين عملتى اللى انا فشلت فيه!
لكنة ابتدا يبعد ومعاملته تتغير،
كانت مش بتغير أو بتتضايق لما كان جوزها بيكلم مراته في التليفون, ولا كانت بتحاول تاخده من بيته وحتى ما كانتش بتتصل بيه, بل بالعكس لو اتقابلوا في يوم واتصل بيها أو بعتلها رسالة علشان يشوفها تانى يوم تقوله: لا علشان مراتك ما تحسش بحاجة.. خليك معاهم النهاردة.
نسيت اقولكم ان صاحبتى دى كانت متجوزاه رسمى مش عرفى علشان انا شخصياً كنت مستغربة للقصة دى، وكنت فاكرة انها اتجوزت عرفى بس شفت قسيمة الجواز بعينى..
اكملكم بقى،
التغيير استمر وصاحبتى حست بيه ازاى؟
كان جوزها بيبعت لها رسايل على الموبايل.. فضل يقل عددها مع الوقت.. وبعد فترة بح، ما بقاش فيه. وطبعا ما بقاش يطلب يقابلها الا كل فين وفين،
وهى ياعينى حاسة انه متغير وما بتتكلمش وعمالة تشتريله فى حاجات !
لغاية ما في يوم اتفقوا انهم يتقابلوا وراحت البيت وواخدة له بيجاما هدية.
واديتهاله بصلها وما علقش، ومرة واحدة انفجر في العياط،،
- ايه فيه ايه مالك؟
قالها:
- انتى جايبالى هدية، والحب فعنيكِ، وانا جاى اكلمك فى الانفصال..
وهاتك يا عياط، ردت عليه بكل هدوء وقالت له:
- طيب انت بتعمل في نفسك كده ليه؟! عايزنا ننفصل اوكى مفيش مشكلة،
استغرب وقالها:
- انتى ما بقتيش بتحبينى؟
قالت له:
- انا عايزة اريحك، طالما انت مش مستريح يبقى جوازننا مالهوش لازمة.
زاد عياطه وقالها انه بيحبها، وانه ما كانش المفروض يتجوزها في السر.
قالت له:
- دا كان طلبك تحديداً,, انت كنت عايز واحدة تفكر معاك، وتبقى صديقة، وحبيبة، وعشيقة، وتبقى الايد التانية اللى بتصقف بيها من غير ما تعمل اى حاجة حرام، وفوق دا كله تحافظ على بيتك.. كنت عايز واحدة تسد لك الخروم اللى فى حياتك، ياترى انا سديت الخروم دى ولا لا؟
قالها:
- انتِ فيكِ اكتر من اللى كنت بتمناه،
وهوبا لقى نفسه مخنوق.. وفتح باب الشقة وقالها:
- هستناكى في العربية
قفلت الشقة ونزلت وروحت على بيتها، وابتدا البعد يزيد ومفيش اى كلام لمده 10 أيام تقريباً. بعدها كلمها بيقولها انها وحشاه وانه بيحبها وعايز يشوفها، واتكرر نفس الموقف بس بطريقة مختلفة شوية، وابتدا يكون فيه نوع من المحايلة علشان توافق انه يطلقها أو بمعنى ادق.. تروح معاه للمأذون علشان يطلقها حضورى،
طبعا فضلت متمسكة بيه شوية، ومع اصراره قالت له:
- خلاص انا هطلق سراحك بس خلى بالك انت اللى اختارت،
ونزلت راحت للمأذون لقيته هناك حاطط رجل على رجل، كله جبروت. طلقها ونزلت هتموت من القهرة يا عينى،
بقى هو ده اللى انا خانقت الدنيا علشانه؟ طلقنى بعد 3 شهور؟!
دا اللى ما حملتوش اى عبأ فى حياته ولا حسسته بوجودى
وفضلت كده يا حرام... كتير.. كتير..
انكسرت من جوه، وبقت فاقدة الثقة فى البنى ادمين، مقتنعة تماما ان مفيش لا ضمير ولا حب، وجرت الايام ولقيته مرة واحدة بيكلمها على النت، وبيقولها انها وحشاه، وانه بيحبها، وانه لسة متجوزها لغاية دلوقتى، وانه عايش ميت، وانه.. وانه.. وانه..
وهى مش فاهمة ومش عارفة هو عايز ايه؟
وياما في الدنيا حكايات أغرب من الأفلام الهندي.
دعاء يوسف
مصر
-----------------------------------------------------------------------------------
1 comments:
رغم اني لست من هواة الأفلام الهندية
لكن أعجبني جدا هذا الفيلم
نتمنى المرة القادمة متابعة فيلم عربي
حتى لو كان ممل المهم لا يتسبب في رفع ضغط الدم
:)
إرسال تعليق