كان يا ما كان في وطنا العربي
واحد قربي
كات شغلته يسقينا تاريخنا
كان قسيس وكمان كان شيخنا
وعمر ما دخنا
ومتعرفش إزاي يوم شخنا
يوم ما قرينا ف نعي القربي
شكر ولي العهد التربي
يومها لطمنا بكسر شقافة
والحدافة ...
حدفت ناحية غيط مش غيطنا
وفرضوا علينا ف حتى عياطنا
دمغة ذل
ويادي الذل يا وطن اتكسر
ياللي راهنت علينا وتخسر
معلوم تخسر ... لازم تخسر
م احنا بقينا كمثل ولية
قتلوا راجلها وسرقوا الدية
وكتبوا ف صك وفاته وفاتها
ليها ملف بألف قضية
وكان يا ما كان في وطنا العربي
* * *
كان فيه شاعر ابن أكابر
مات من قهر الزمن القادر
قال له يا شاطر اوعى تخاطر
اوعى ف كلمة تحق تكابر
اوعى يا والي الأمة تصالح
اوعى تقول الدنيا مصالح
دمنا مش فـ البورصة مكانه
سد الوالي بطينة ودانه
وقالوا الشاعر طق جنانه
حاجة تجنن
م الشحات عارفينه حرامي
بس لقاله ما بينا محامي
رجع لقمة ولقم اللقمة
وقال لصحاب الطبخة.. يحنن
والفزورة مهيش فـ الصورة
حشو الصورة كلاب مسعورة
والجرانين عمالة تصور
صورة وصورة وصورة وصورة
لما بقت ملاينهم ( تورة )
مصوا نخاع مريم ووليدها
ودفنوا عيال القدس ف جورة
سرقوا يا بابل كحل عنيكي
لجل يحلوا النجمة العورة
حلفوا لـ (جولدا مائير) تصاويرها
جوة الكعبة تكون منشورة
والطرابيش والعبي تطاطي لفعل الواطي
واللي يهاتي بكرة ح ينسى
لما الكبسة ف معدته ترسى
تحت هبر مولانا الحاتي
ويادي الذل يا وطن اتكسر
ياللي راهنت علينا وتخسر
معلوم تخسر ... لازم تخسر
م احنا بقينا كمثل ولية
قتلوا راجلها وسرقوا الدية
وكتبوا ف صك وفاته وفاتها
ليها ملف بألف قضية
وكان يا ما كان في وطنا العربي
* * *
الحجاج يا قهاوي البصرة
صدق ف القول
كشف الورق الجي ... عرفنا
يعني بلغة اللعب ... كشفنا
قال لزمانا اللعب أصول
لم ولاد اللعب ف كمه
ولجل محدش فيكم خمه
أش زمنكوا وبصر ( بصرة)
فات لزمانا بنات وشيوخ
وعشان لما هنيجي ندوخ
حكم الحكم بكل شموخ
هي رقاب لازم هقطفها
كان يقصدنا ...
بس السيف الأ‘عمى قطفكم
وأما سكتوا كتر خيركم
جبتوا درفها
من دا الحين وغراب البين
حكم إن احنا نشيل الطين
وإن سب لنا نقول له ... آمين
والعداد يا شرف بغداد عمال بيعد
والملهوفة حيطان الكوفة أهي بتتهد
لجل عيون النجمة البايرة يا ناسنا السو
صادروا بلادنا عشان تحلى لهم بر وجو
ويادي الذل يا وطن اتكسر
ياللي راهنت علينا وتخسر
معلوم تخسر ... لازم تخسر
م احنا بقينا كمثل ولية
قتلوا راجلها وسرقوا الدية
وكتبوا ف صك وفاته وفاتها
ليها ملف بألف قضية
وكان يا ما كان في وطنا العربي
* * *
يامو صلاح الدين الأصلي
يا ماركة بختم نضيف رباني
جابوا ف الشركة شبيه لوليدك
مليون نسخة ... ضمان مجاني
بس شبه يشبه لنفوسنا
والتقفيل صيني وتايواني
م الكتالوج العربي اختاري
مدفع خيبة وجيش حماري
حطي الفيشة ودوسي الزر
كل جيوش أعادينا تفر
شفتي المر يا ست تاريخنا
فكرنا أصبح فكر ( أتاري )
داري علينا وداري دموعك
د الموضوع أصبح موضوعك
لمي عجزنا وقيدي علينا
ف بير الجاز اللي مغمينا
متخليش لا خروف ولا ديب
لحسن تيجي ف يوم تلاقينا
بلبس الحج ف تل أبيب
يومها هيبقى القدس اتهود
والحاخامات على قبر محمد
واحنا لسانا عشان متعود
هيقول دا المكتوب ونصيب
ويادي الذل يا وطن اتكسر
ياللي راهنت علينا وتخسر
معلوم تخسر ... لازم تخسر
م احنا بقينا كمثل ولية
قتلوا راجلها وسرقوا الدية
وكتبوا ف صك وفاته وفاتها
ليها ملف بألف قضية
وكان يا ما كان في وطنا العربي
***
امضوا معايا بلاغ ف الأمة
من أبابيل الله والهمة
أبرهة راجع ياخد تاره
بعد ما داوى الفيل والرمة
تيجوا نجرب نغضب مرة ....
تيجوا نعيش احساس الدرة
لما ولاد الكلب اتملوا
وشافوا ف عينه سنينا المرة
صلبوا دموعه ف أوتار صوتنا
حكموا علينا نزامل موتنا
ملكوا الوقت وسرقوا الماضي
واشتروا بكرة بسعر سكوتنا
واللي يقدر سعرنا كام
شيخ المنسر أونكل سام
نطلع فالصوا منسواش يورو
واللي يعارض ياخد دوره
انتي يا أمة بتنسي تشمي
ولا ضميرك عنده زكام
إنتي يا أمة معدش يهمك
اللي يسب لأبوكي ولأمك
واللي بيقطف زهر عيالك
واللي بينقع سمه ف دمك
ويادي الذل يا وطن اتكسر
ياللي راهنت علينا وتخسر
معلوم تخسر ... لازم تخسر
م احنا بقينا كمثل ولية
قتلوا راجلها وسرقوا الدية
وكتبوا ف صك وفاته وفاتها
ليها ملف بألف قضية
وكان يا ما كان في وطنا العربي
محمد عبد الرحمن حجازي
شاعر مصري مقيم بالسعودية
-----------------------------------------------------------------------------------
0 comments:
إرسال تعليق